[評分問題] 承接上次的問題 夏娜區錯字扣分一事

嘛,已經超出投訴範圍了,但係我都繼續交代吧
o係講字數問題之前,請先睇下呢兩版o既版規
http://bbs.kyohk.net/thread-558347-1-1.html
http://bbs.kyohk.net/thread-554430-1-1.html
灼眼のシャナ o既版規係以 動漫貼圖 o既版規為藍本編輯而成
字數限制原先是一樣的,只不過我因應灼眼のシャナ版的情況而修改回覆方面o既限制
我想問,開貼的區區30字會有問題?無錯,係區區30字,點解我會用咁o既語氣?
好簡單,我認為只有稍為有心,30字並唔係一個無理o既數字
有陣時就算問野,應該係要比一條清楚o既問題人
For example: 灼眼のシャナ係講乜的?
假若標題同內容只係得呢一句咁o既野,我想問佢到底係咪有心問?
比個真實例子你 http://bbs.kyohk.net/thread-636765-1-1.html
對於1樓,佢只係以「我覺得有」呢個理由而開貼,但係佢有無心去問其他會員o既看法?

重有就係,只要稍為食腦的人都知所謂o既字數限制係有得少d
只要o係文章中加少少字/寫少少題外話就已經可以減少自己必須打o既字數
捉賊o既最識做賊,即係代表 做賊o既識得點做賊
我自己曾經係一個水人,一個水人會對一d咩版下手我清楚
要確保個版唔會有水客來「搞事」,限制就是最佳的辦法

討論並唔係只係講o既「重點」就可以
係要有理據支持,你呢一個「重點」先會有說服力
我相信閣下係應屆/來屆的會考生,我想問一下你中英文的小組討論
閣下是否只係說出了「重點」而無論証就停止了發言呢?

論壇「唔一定」係由水組成,只係kyo o既大部份元素係咁
應該係話,大部份香港o既討論區都係咁
我訂o既規則就係希望「迫」到一d質素出o黎,
我而家已經慢慢咁放寬緊限制,但係每一件事都要有步調,不能一氣呵成
Quota o既用意在於 汰弱留強 ,
我所訂o既限制就係希望o係kyo中搵到質素呢兩個字
而家我已經慢慢咁搵到了

唔同地方有唔同方言,每個人堅持自己o既方言最終只會無法溝通
我o既名詞限制其實係建基於一個假設
「觀看不同字幕組的人會來討論」,要形容的話用兩個字「預防」
唔同譯法我知道呢一點
但係你可以保證無人會睇到「弗萊姆黑茲」之類o既翻譯之後拎o黎討論?
你不能,我亦不能
o係呢個發生o既可能性唔係絕對的0 o既情況下
我地身為版主係有責任保持討論可以順利進行.而唔係o係發生o左問題先去補救
所以為了「預防」呢一批人仕,我先會有呢個標準
當然,時間可以改變一切,假若日後會員們可以自覺地統一名詞
呢一條亦會廢棄

對於我扣分一事
其實好多人已經唔係第1次犯,佢地係清楚知道呢條規則
嘛,我o係佢地第1次犯就扣分呢一點雖然係有少少違反o既合約 (第1次犯=都成幾個月之前)
不過目前我o既手法已經無開版頭果2個月咁強硬
對於一d初犯版規者我已經用pm通知要求修改,時間亦到充份的給予了,
不過有時並唔係個個都改,人情我已經給予了,人地唔受我只好依法辦事

10樓的例子,我想問,
你同個外國人講o既話會講David還是碧咸?
外國人同你講的話會係David定係碧咸?
你同個本地人講o既時候又會講邊個?
本地人同番你講又會講乜?
你同外國人講碧咸,佢未必明係邊個
你同個本地人講David,佢都未必明係邊個
本地人同外國人同你講David,你未必知係邊個
所以自己係有責任去配合唔同人o既唔同言語
但係試問翻譯之多有幾多個?你會唔會有時間睇哂全部翻譯?
你唔知個翻譯就無辦法去配合人地,
所以我訂o既表準就係給予一種媒介去令每一個人會互相配合
作為一個「先例」有反對聲音係在所難免,所以目前的o係度尋求緊一個平衡點

立法.無錯係要聆聽大眾o既聲音,但係點解要立法?
立法背後o既意義就係要保障人o既利益
但係唔係每一個人o既利益都「完全」保障到
知唔知點解d工會要求立法最低工資?為了保障打工仔o既權益
表面睇起o黎呢一件係好事
但係有陣時係「好心做壞事」,最低工資換o黎o既只會增加失業率 (有讀過Econ就會明)
政府而家重未立法係因為要確保人人有工開.,
而且知唔知點解美國咁多工潮?自由係一件好事,但係有人會濫用,如此而已
假若人人有自覺,規則只係一件多餘o既產物
但係o係人人有自覺之前,規則係一件必要o既產物